لو كنت مكان المجلس العسكرى

ماحدش سأل نفسة هو فين الطرف التالت دلوقتى؟ مابيشتغلش ليه؟

طيب البلطجية فين؟ واخدين اجازة ولا مبسوطين من وصول مرسى للرئاسة؟

الكنايس بطلت تتحرق ليه؟ ماحدش بقى ليه اخت بتتخطف الايام دى ولا ايه؟

الاجابة من وجهة نظرى التاّمرية ان كل الكلام دا بيحصل بضغطة زر

حد بيدوس زرار الطرف التالت الحرائق بتم والمذابح بتحصل

حد بيدوس على زرار البلطجية فيخرجوا فى مناطق معينة ويقوموا بالواجب

حد بيدوس على زرار نلاقى "اخت" اتخطفت وكنيسة ولعت وبنفس السيناريو

مين له مصلحة انه مايدوسش على الزرار دلوقتى؟

وهو مين اصلا اللى بيدوس على الزرار؟

من وجهة نظرى التاّمرية برضة ان اللى بيدوس على الزرار هى شبكة المصالح اللى بتحكم البلد طول السنين اللى فاتوا واللى يعتبر المجلس العسكرى الواجهة ليها

لو انا من المجلس العسكرى اكيد مش هادوس على الزراير دى دلوقتى  لسبب بسيط .. انه هايتفضح اكتر ماهو مفضوح ومش هايعرف يشيل الاخوان الليلة

طيب يعمل ايه؟

يوم إعلان النتيجة الشعب كلة  بثواره  بفلولة بكنبته حسوا براحة ان البلد هاتهدى على عكس لو كان شفيق اللى كسب كانت البلد هاتولع ... بس هاتولع ازاى؟

هاتولع بتجمع الاخوان والتيار الاسلام السياسى كلة مع الثوار ضد شفيق والمجلس العسكرى ومن وراهم شبكة المصالح

الحل كان الاعتراف بفوز مرسى واهو رئيس شوية كام شهر مافيش مشكلة

والاخوان مافيش احسن منهم يموتوا فى السلطة

فلو الاخوان اخدت الحكم "حتى لو الظاهرى" بس قدام مرشح الدولة اللامؤاخذة العميقة يبقى مافيش مشكلة

الاخوان أعجبتهم كثرتهم "كالعادة" وبيتعاملوا بطريقة تخللى حتى اللى كان مبسوط ان مرسى كسب يقلب عليه وعلى الاخوان، فما بالك باللى كارهين الاخوان اصلا

يبقى البلد تهدى خالص وماحدش يدوس على الزراير الكبيرة دلوقتى

سايبين الاشبال عندهم يلعبوا بالزراير الصغيرة "كهرباء، غاز، مياه،بنزين، ... الخ"

انما الزراير الكبيرة متشاله لوقت يكون الاخوان خسروا اى ارضية ليهم بتصرفاتهم ويكونوا كوشوا كالعادة على اى سلطة تقع تحت ايديهم والاعلام التابع للشبكة شغال الله ينور

ساعتها يكون الاخوان محتلين صدارة المشهد

يبدأ هنا اللعب على الزراير الكبيرة

إندساس وسط مظاهرة وتقلب مدبحة ومرسى ومن وراه الاخوان هايكونوا هم المسؤولين بحكم مناصبهم

انتشار البلطجية مع الاختفاء الامنى المتعمد وساعتها الوزارة هاتكون تحت قيادة مرسى يعنى هو المسؤول

حرق كنيسة لتحرير "اخت" مخطوفة .. وساعتها هاتكون ارضية حرب طائفية جاهزة وماسبيرو كانت خير بروفة .. حالة الاحتقان الطائفى كانت رهيبة ولأول مرة اشوف ناس بتوقف ناس من الشعب برضة عشان يشوف مسلم ولا مسيحى ولو مسيحى يتضرب وهو ونصيبة .. الحمد لله ربنا ستر فى ماسبيرو بس ماحدش يعرف ايه اللى ممكن يحصل لو حصلت تحت حكم الاخوان

ساعتها هايكون تدخل المجلس العسكرى لفرض النظام فى الشارع امر منطقى بل ومطلوب من فئات كتير من المجتمع وفرض الاحكام العرفية هايكون امر حتمى ومرسى ومن وراه الاخوان هايقعدوا يتفرجوا زيهم زى بقية الناس على اللى بيحصل بل واعتقد ان سيناريو حزب "النهضة" التونسى هايتكرر وبعنف

كل ما سبق هو سيناريو اسود وكئيب واتمنى انى اكون غلطان فيه

بس الاخوان بيمهدوا للسيناريو دا بأفعالهم وتصرفاتهم التى لا تمت بصلة للواقع اللى عايشينه

لسه بيفكروا بفكر التنظيم السرى

ولسه بيفكروا بضيق افق

ولسه خايفين من الثوار

ولسه بيقعدوا على حجر العسكر

ايه معنى العفو العام عن شخصيات إسلامية جهادية بجرة قلم انما الثوار المحكوم عليهم عسكريا لسه مرمين فى السجون ولسه بيتعذبوا ولسه اهاليهم بيتعذبوا ولسه النشطاء بيتخطفوا ولسه اول حاجة بيفكروا يعملوها فى الدستور هى تنظيم "حرية التظاهر"

مش قادرين يفهموا قد ايه قرار العفو اللى اصدره عن الشخصيات الجهادية "اللى بالمناسبة محكوم عليهم فى قضايا قتل وتفجير وإرهاب" وسايبين اللى اتمسكوا عشان واقفين فى مظاهرة، مش قادرين يفهموا قد ايه قرار زى دا هايقلب عليهم الرأى العام والخاص

ايه ضيق الافق دا

مش قادرين يفهموا ان الثوار مش عايزين حاجة غير ان البلد تنضف

انما شبكة المصالح اللى ورا المجلس العسكرى مش عايزه حاجة غير مصالحها الشخصية حتى لو حساب البلد

بمعنى تانى مصلحة الاخوان فى الوقوف مع الثوار عشان عمر الثوار ماهايبيعوهم

انما الشبكة تبيع ابوها لو فيها جنية زيادة

فوقوا قبل ماتضيعوا البلد

Twitter: @Hatemzaki9

Jul 31 2012

مصر

البلد اللى فيها بحرين

البلد اللى في قارتين

البلد اللى رابطة حضارة 3 قارات

البلد اللى فيها نيل قاسمها نصين وفى نفس الوقت رابطها

البلد اللى اتدفن فيها غزاه من كل الحضارات

البلد اللى فيها قناة طولها 100 كيلو رابطة العالم ببعضة .. وشعبها هو اللى حفرها بإيده

البلد اللى فيها الهرم اللى هو اهم اثار العالم القديم والجديد  وشعبه هو اللى بناه بإيده من الاف السنين وعمره حتى ما احتاج ترميم

البلد اللى كل الديانات السماوية كرمتها

البلد الوحيده اللى ذكرت فى القراّن و 3 مرات

البلد اللى فيها بحر انشق نصين ورجع تانى

البلد اللى كل فلاسفة العالم احتاروا فى توصيفها

البلد اللى علمت العالم كلة يعنى ايه حضارة فى وقت كانت كل الحضارات عايشة فى عصور ظلام

البلد اللى خلقت علوم من الاف السنين لسه لحد اناهرده بيفكوا شفراتها

                                                 ....

البلد اللى فيها شعب يهاجر عشان لقمة العيش ولما يعيش كويس يرجع عشان بيحبها حتى لو هايعيش اوحش

البلد اللى فيها شعب يهاجر عشان مش محترمين عقلة فلما يكرموه بره يرجع يفيد البلد مع انهم مش هايقدروه زى بره

البلد اللى فيها شعب بيضحك من الهم

البلد اللى فيها شعب يقدر يتكلم جملة واحدة فيها العامية والفصحى والانجليزى والفرنساوى واللى قدامة يفهمة

                                               ....

بلد زى دى ماينفعش تضيع

مصر اقدم دولة فى العالم

مصر قد تمرض ولكن لا تموت

مصر خُلقت لتبقى

Twitter: @Hatemzaki9

30 June 2012

ايه الجديد - ياسر المناوهلي (الاغنية + الكلمات)

ايه الجديد .. الطير جناحه بيتربط لسه في حديد .. لسه العبيد عايشين عبيد

ايه الجديد .. الطير جناحه بيتربط لسه في حديد .. لسه العبيد عايشين عبيد

بالاقتناع , كل اللي فاضل يعلنوها .. عالمشاع

ان اللي خان كان مشتري .. وان اللي مات هو اللي باع

 
بالذمه مين المستفيد ؟ .. فرعون جديد

واللا القديم لساه ملك .. واللا احنا شعب بزمبلك .. يؤمر نطيع

يشخط نبيع .. معقول يكون لسه القطيع .. عايشين قطيع

وفرحانين .. بالمألسه والابلسه والملعنه

معقول تكون لسه الاماني .. رغم اللي كان مش ممكنة

بعد اللي فات .. بعد اللي مات

لسة السكات هو السكات .. رغم اللي كان

الحق مش محتاج بيان .. علشان يبان

الحق مش هايعود لواحد عاش جبان

يا شعب حر .. الحق يرجع بالميدان .. الحق يرجع بالميدان

Twitter: @Hatemzaki9

13 June 2012

خروجا من الازمة

بعد حالة الاستقطاب الرهيبة اللى شغالة اليومين دول لأول مرة بدأت احس بأمل او الجزء المليان من الكباية

الامل الا يدخل حمدين صباحى السباق وانها جت من عند ربنا انه خرج!!!

اقولك ازاى .. لو صباحى كسب هايضطر يواجهه شبكة القراصنة اللى بتتكون من الاجهزة الامنية (جيش، مخابرات، امن دولة، مخابرات عسكرية) زائد شبكة المصالح (رجال الاعمال الفاسدين) زائد اعضاء الحزب الوطنى "المنحل"، غير بلطجية الداخلية وفى ضهرهم امريكا و اسرائيل والسعودية،  بالاضافة ان التيار الاسلامى اكيد ماكانش هايرحمه

بمعنى تانى كل ما يجى يعمل حاجة هايولعوله البلد

دلوقتى يا اما شفيق يا اما مرسى

لو مرسى كسب، الاخوان هاتواجه شبكة القراصنة دى لوحدها لو حاولت تطهر اى منها، او بمعنى تانى لو فكروا يعملوا فيها ثوريين برضه هاولعولهم البلد

دا غير ان الشارع مش هايرحمهم لأنهم مسؤولين عن كل السلطات فى البلد

طيب لو شفيق كسب ..

شفيق لو كسب الاخوان هايجروا فى الناحيتين، هايحاولوا يضمنوا ان الرئيس اللى جاى مايحلش البرلمان و بالتالى صفقات جديدة وفى نفس الوقت هايجروا للتيار الثورى طلبا للتكاتف ضد العسكر

والشارع الثورى مش هايسكت على اى انتهاكات و هايكونوا متحفزين عشان عارفين ان العسكر هاينتقموا منهم

وطبعا موضوع الامن فى 24 ساعة عشان يلم حواليه المغيبين و الجهلة اللى فاكرين ان الاستقرار هو وجود عساكر فى الشارع

لكن الامن الحقيقي هو استقرار الحياه السياسية وتطهير حقيقى للمؤسسات

طبعا شفيق مش هايعمل كده وحلال عليكوا الايستيكرار

يعنى لو حمدين كسب فى الظروف دى هاتطربق على دماغة

لو مرسى كسب هاتطربق على دماغ الاخوان

لو شفيق كسب هاتطربق على دماغه ومش على دماغ العسكر عشان هايكونوا بره الصورة

لما يتحول الاخوانى مرسى لرمز لحماية الثورة فتلك ليست ثورة او ليست ثورة 25 يناير بالتأكيد

وان يتحول العسكرى شفيق الى ممثل الدولة المدنية فبالتأكيد مدنية دى تبقى ...

قوة شفيق فى وجود مرسى وقوة مرسى فى وجود شفيق

لولا وجود مرسى ماكانش شفيق اخد نص اللى اخده

رأيى ان وجود حد من الاخوان لعبة ووجود عمر سليمان لأيام تم فيها الاستقطاب الرهيب ثم احمد شفيق الذى الذى صعد نجمة بهدوء وحصد كل اصوات الاستقطاب

فى جميع الاحوال الحل هو تشكيل جبهة وطنية معارضة حقيقية، مؤسسية، ذات شرعية والملايين اللى انتخبوهم هايكونوا فى اول الصفوف

الجبهه دى هى اللى لازم تستعد لتسلم السلطة فى غضون سنوات قليلة اقل من 4 سنوات بكل تأكيد سواء شفيق او مرسى اللى كسبوا

لازم صباحى و ابو الفتوح وخالد على وهشام البسطاويسى وابو العز الحريرى و البرادعى وكل الرموز الوطنية الثورية تتجمع تحت سقف واحد ومطالب واحده ولازم نبدأ اناهرده قبل بكره

لأن بحالة الاستقطاب اللى شغالة دى ممكن مايكونش فيه بكره عشان الناس حاسة انها بين خيارين .. او خيارتين وهم رافضن الاتنين

لازم الناس تحس بأمل وبسرعه قبل ما حالة الاستقطاب دى تودي مصر كلها فى داهية

الناس المفروض ماتتشائمش .. وماتزنقش نفسها بين اختيارين مش عايزاها
انتم الاقوى والاكثر عددا

تفائلوا خيرا

Twitter @Hatemzaki9

27 May 2012

دعوه للمصالحه

دعوه للمصالحه

كنت و مازلت ادعو بكل قوة للمصالحه بين جميع طوائف الشعب و خاصة القوى الثورية جمعاء

وادعو جميع الاطراف لنبذ الخلافات و ادعو للتوحد من اجل إنجاح الثورة و نهضة مصر

ولكـــــــــن.....

ولكن كيف تتم المصالحه؟

الخطوة الاولى فى المصالحه –اى مصالحه- هى الاعتراف بالاخطاء

الاعتراف بالاتفاق مع المجلس العسكرى

الاعتراف بمهاجمة الثوار

الاعتراف بالسير فى طريق غير طريق الثورة

الاعتراف بنفضيل المصالح الشخصية و الحزبية على مصلحة الوطن و الثورة

الاعتراف بما تم الاتفاق عليه مع المجلس العسكرى منذ اول لحظة

الاعتراف لماذا وافقوا على عمل الاستفتاء

الاعتراف لماذا وافقوا على الترقيعات الدستورية و رفض الدستور الجديد

الاعتراف لماذا تم دفع رشاوى من اجل دخول البرلمان

الاعتراف لماذا تركوا الثوار فى الميدان و تنكروا لهم بل و تم مهاجمتهم بأبشع التهم

الاعتراف لماذا قالوا ان الشرعية للبرلمان وان دور الميدان انتهى

الاعتراف لماذا تركوا الشيخ عماد و الدكتور علاء عبد الهادى و 10 اخرين الذين استشهدوا فى موقعة (لا للجنزورى) ولماذا أيدوا الجنزورى

الاعتراف لماذا تركوا "ست البنات" تسحل و تعرى و قاموا بمهاجمتها

الاعتراف بالخطأ عندما وقف شباب الاخوان لحماية البرلمان ومنعهم بالقوة لمجرد انهم كانوا يطالبون بتسليم السلطة كاملة للبرلمان !!!!!

الاعتراف بالاسباب الحقيقية لفصل ابو الفتوح و ترشيح الشاطر و مرسى

الاعتراف لماذا استولوا على اللجنة التأسيسية للدستور

الاعتراف لماذا لم يكونوا برلمان للثورة

الاعتراف بماذا كانوا يحتفلون فى 25 يناير 2012

الاعتراف بالتخلى عن الدم الذى هو اكثر ما يتناقض مع مبادئهم

الخطوة الثانية هى عدم الاستعلاء و عدم قياس اوزان التيارات بناءا على تصورات خاطئة

لو كانوا حسبوا الاوزان فى ال 18 يوم للثورة لما نجحت الثورة

ولكن كان القياس بالتضحية و الاقدام و الثبات على الحق

اذا رجعنا جميعا الى هذا المقياس سننتصر

ولكن ما يحدث الان هو الجزء الثانى من المسلسل

حتى عندما قرروا النزول مرة اخرى للميدان (ومن حقهم ان ينزلوا طالما لا يعبر البرلمان عنهم) قرروا النزول فرادى

كانت هناك دعوة للنزول يوم 20 ابريل اول ما انا شخصيا سمعت عنها كان يوم 30 مارس فلماذا قرروا الا ينضموا؟

لماذا قرروا ان اليوم 13 ابريل هو انسب؟

لسبب بسيط هو انهم متعجلون لصدور قانون عزل سليمان فقط

بمعنى انهم يستخدمون الميدان مرة اخرى من اجل مصلحه خاصة

نعم مصلحة خاصة

لماذا انتفضوا لعزل الفلول اليوم فقط؟

الم تطالب جميع القوى الثورية بهذا القانون من العام الماضى؟

لماذا خافوا من عمر سليمان و قرروا عمل قانون فقط له هو؟

لماذا لا يخشون من بقية الفلول .. لم ينتفضوا عندما ترشح احمد شفيق و عمرو موسى للترشح

هم لا يهمهم ان يأتى رئيس فلول .. لن يخشوا عمرو موسى لو فاز ولن يخشوا احمد شفيق لو فاز

هم يخشون عمر سليمان من اجل مصالحهم

ونحن نخشى على مصر من الفلول جميعا

الثورة لا تخاف من اشخاص و لا يفرق معها غلق باب الطعون ولا تخشى نفوذ اللجنة الرئاسية "الالهية" ولا تخشى المجلس العسكرى بجبروتة ولا تخشى فى الحق لومة لائم..

لا تأتوا اليوم لتقولوا لمن لم ينزل اليوم انه باع الثورة

لا تتكلموا عن الثورة.. فأنتم بعتم الثورة و ركبتوها و قدمتوها على طبق من ذهب للفلول

انتم تعلمون ان المجلس العسكرى هو قائد الثورة المضادة ورئيس المجلس الاعلى لنظام مبارك

لماذا لم تحاربه معنا

لماذا لم تنتفضوا لشرفكم الذى مرمطه المجلس العسكرى؟

اذا كان البرلمان لا يمثلكم كما لا يمثلنا فالتنزلوا الميدان مثلكم مثل اى شخص هناك بل اقل

ففى قلبهم جرح غائر منكم ..منهم لة اخ استشهد او عين فقئت او اخت سحلت او ام ثكلى

عليكم تضميد الجرح

عليكم بالقصاص للدم قبل اتهامكم لمن لم ينزل معكم انه باع الثورة

الثوار هم من حموا الثورة وظلوا يدفعون الدم حتى تنعموا بكراسيكم فلا تخرجوا ثورتكم الصدئه من المخزن و تطالبونا بإتباعها

ما يهمنا هو ثورتنا .. اذا اردتم العودة للميدان فاعلموا انكم جزء منه وليس جزء منكم

لا سبيل لنا الا بالتوحد ونبذ الخلاف و نبذ الفلول

فلا تكابروا .. عليكم الاعتراف .. وعلينا قبول المصالحة

Twitter: @Hatemzaki9

13 April 2012

من قال ان الثورة بلا قائد !!!

يسألونك عن قائد هذة الثورة و كأنهم ينتظرون إجابة مثل ملاك هبط من السماء ليقود الناس للحرية

لا يملكون القدرة على الخيال بأن قائد هذة الثورة هو دم الشهيد

دم الشهيد ما لم يبرد و ما لم يتلقى اهلة العزاء فية .. فالثورة مستمرة

لا يملكون القدرة على الخيال بأن قائد هذة الثورة هو حلم

حلم إختمر فى عقول و قلوب المصريين وما لم يتحقق هذا الحلم .. فالثورة مستمرة

مبارك عندما اراد ان يتفاوض لم يكن يعلم على ماذا يتفاوض .. ولذلك سقط

سقط عندما ظن ان النخبة السياسية هى القائد و لم يخطر بباله ان اهل الشهيد لم يتلقوا العزاء بعد

عندما كان يحارب مبارك الثورة لم يكن يعلم من او ماذا يحارب .. ولذلك سقط

سقط عندما ظن ان الشباب مُغرر بهم ولم يعلم انهم ضحوا بأنفسهم من اجل حلم لن يموت معهم

و عندما سقط مبارك و استلم المجلس العسكرى مقادير إدارة البلد إستبشر معظم الشعب خيرا على انة قد فهم و استوعب ما قام به الشعب و ما يحلم بة الشعب .. و لكن مع مرور الوقت بدأ يتكشف يوما تلو الاخر ان المجلس العسكرى لم يتعلم من دروس الماضى القريب

كان المصريون على إستعداد لخروج "مشرف" للمجلس العسكرى فى حالة إحساس الشعب ب "عودة الابن الضال" و لكنه اتضح انة قد ضل الطريق تماما و جره أصدقاء السوء الى طريق الهاوية و سقط بإمتياز

سقط عندما نسى ان اهل شهداء ال 18 يوم لم يتلقوا العزاء بل تلقوا اللكمات

سقط عندما اضاف الى لوحة الشرف اسماء شهداء جدد

سقط عندما اراد ان يسمم نسيم الحرية 

سقط عندما اراد ان يطفئ نور الحلم و اراده لنا كابوسا

قائد هذة الثورة ايها السادة هو دم و حلم

اذا اردتم التفاوض فالتفاوض يكون اولا بوقف نزيف الدم ثم القصاص للدم ثم تنفيذ الحلم

 تعلموا الدرس قبل ان يدهسكم قطار الحلم

Twitter: @Hatemzaki9

5 Feb 2012

اثبت مكانك كايروكى + زاب ثروت (الاغنية + الكلمات)

اثبت مكانك هنا عنوانك 

ده الخوف بيخاف منك و ضميرك عمره ما خانك

اثبت مكانك 

ده نور الشمس راجع

 يا تموت و انت واقف يا تعيش و انت راكع

اثبت مكانك ده عينيك شايفة الدليل

 ابعد عنهم و سيب الحيطة عليهم تميل

اثبت مكانك 

قلب الوطن اتجرح

 و صوت الحرية خلاص اتنبح 

كلامك ما بيتفهمش احساسك مابيتوصفش

كلامك ما بيتفهمش احساسك مابيتوصفش

 انت بتقول كرامة هما يردوا بمهانة

... انت بتقول العدل بيقولوا عنك ندل

اثبت مكانك هنا عنوانك 

ده الخوف بيخاف منك و ضمير عمره ما خانك

انت نور الفجر

 و هتافك صوته اعلي من صوت الخوف و الغدر

اثبت مكانك و ادعي وايا الادان

 لك رب اسمه الحق و العدل و السلام

اثبت مكانك و كتفك في كتف اخوك

 لو مهما راحت تروح الفكرة مش هتموت

كلامك ما بيتفهمش احساسك ما بيتوصفش

كلامك ما بيتفهمش احساسك ما بيتوصفش

انت بتقول كرامة هما يردوا بمهانة انت بتقول العدل بيقولوا عنك ندل

مطلوب منك السكوت تكون انسان بديل

مطلوب تسكت تموت او تعيش اسير

عايش في اكبر سجن بس من جوايا حر

حاضر حتعجب تكفي عني كل الشر

الولاء للماضي افكار لينا صديقة

كذب الكاذب جوايا تاكد الحقيقة

انعكاس تاريخ الزيف في المرايا واضح

طوبة تكسر المرايا للحقيقة فاضح

و مستورين من جوانا لو جسمنا انكشف

فاللي ينطق بالحقيقة بالخيانة اتوصف

انهازمي و انهزم لكن انتصاري اتسرق

الحقيقة فبروكها بحزن علي كتاب اتحرق

انا اللي ماتوا من سنة و اللي قاتل ما اتشنق

انا السطور علي الورق انا اللي من جوا اتحرق

انا اللي شعر شاب بموته و هو طالب مدرسة

انا اللي ثابت مهما قالوا و مهما زودوا الاسي

كلامك ما بيتفهمش احساسك ما بيتوصفش

كلامك ما بيتفهمش احساسك ما بيتوصفش

انت بتقول كرامة هما يردوا بمهانة انت بتقول العدل بيقولوا عنك ندل

Twitter: @Hatemzaki9

30 Jan 2012

Cairokee ft. Zap Tharwat

منصورة يا مصر - تميم البرغوثى ومصطفى سعيد (الاغنية + الكلمات)

منصورة يا مصر مش بجِميلة العسكر

إحنا اللى روَّحنا بدرى بس مش أكتر

قول للى روَّح عشان يرتاح فما ارتاحشى

الراحة كلِّ ما تستعجلها تِتْأخَّر

واللى ها ينزل ها يُحكُم لو ما روَّحشى

قصر الرياسة ببلاش، بسِّ انت مستخسر

قصر الرياسة ما فيش بينك وبينه كتير

فيه سلك شائك وكيس رملة وكُشْك غفير

لو جيت لوحدك، ها يضرب، والرقاب ها تطير

وان رحت مليون، ها يهرب، وانتَ تبقى أمير

رئيسنا واحد شهيد، يحكُم من التحرير

قصر الرياسة الجديد بِصينِيَّة ومدوَّر

منصورة يا مصر بجِميلة خيام الخيش

بيحرقوه عشان تمشى فمابتمشيش

يا مصر عُمْرِ ما فيه ثورة تقوم بِشْوِيش

المُلك ده اللى ادِّتيه للعسكرى بقشيش

حقّ الغلابة اللى ماتوا فى طابور العيش

وبنت عَرّوها فى الشارع وشيخ أزهر

نفس العَدُو هُوَّه هُوَّه بَسِّ متنكَّر

الصبح طالع لِقِى دبابة فوق راسُه

مربَّعة فوق دماغُه وكاتمة أنفاسُه

والشرق مقفول وخِتْمِ النِّسر ترباسُه

قام خبَّا شمسُه ووزَّعها على ناسُه

على العيال اللى ماتوا غدر وانداسوا

بقى شرق فى كل جسم، وشمس بتنوَّر

كان للفراعنة إله قرد وإله تمساح

وللإله كهنة و حرس يقف بسلاح

وخزنة متقفِّلة بالضبة والمفتاح

وقصر يشبه قصور الجمهورية بَراح

يا عينى ع الآلهة بقوا فرجة للسياح

ياللى بنسر وسيفين فرحان ومتكبَّر

الشمس تُدعى الغزالة فى اللغة فاعلم

وبالغزالة المضيئة فى السما باحلم

غزالة ممكن تبيِّن طبعها الوحشي

ما يغرّكمش الأسامى ورقِّة المبسم

دى شمس واللى يكتفها ما يفلحشي

ومصر حالفة ها تتحرر، هاتتحرر

Twitter: @Hatemzaki9

30 Jan 2012

Mansoura ya Masr: 

Lyrics:Tamim elbarghouti

Song: Mostafa Saieed