الموكب .. ياسر المناوهلى (الاغنية + الكلمات)

يا صاحب المنصب .. يا معدى بالموكب

دايس فى خلق الله .. فينا الحرس ترهب

يا حارس الموكب .. حامى حمى المنصب

ارحم عبيد الله .. يا كتر ما بترهب

بترهب اللى عايش مطاطى الريح

بترهب اللى منه فيه بتزيح

بترهب اللى حر سكاتة فصيح

عايش مطاطى الريح

منه وفيه بتزيح

تسحل كرامة شعب  .. حر سكاتة فصيح

يركب معاها الصعب .. وقلبة منها جريح

ومربياله الرعب .. وقرارها بره كسيح

يا معلق الدبورة والنسر للتجريح

ابعد تشوف الصورة .. فيها الجتت تلاقيح

كافى عليكم بقى .. لكل نجمة ضريح

كافى عليه الشقى .. من قلة اللحاليح

يا مصر امتى تردى .. انهى شرع دا اللى يبيح

لجل الوزير ما يعدى .. الامن فينا يطيح

اسد عليا، وعلى اليهودى نعامة

سلملى على مدريد .. واوسلو وكامب دافيد .... وعلى الكرامة

اسد عليا، وعلى اليهودى نعامة

سلملى على مدريد .. واوسلو وكامب دافيد .... وعلى الكرامة

يا أمة قومى .. إزئرى او حتى زومى

عدوى بيأكلنى .. وبيصنع هدومى

الوش شاحب ليه

والقمح دبلان ليه

والساقية عطلت ليه .. محتاجة لتصليح

من جنابه للى .. عايش مطاطى الريح

من سعادتة للى .. عايش مطاطى الريح

من فخامة امة للى .. عايش مطاطى الريح

سلح .. سلح .. سلح ... عدوا وكوموه

سلح .. سلح .. سلح ... بس اوعوا تستخدموه

سلح .. سلح .. سلح ... عدوا وخزنوه

سلح .. سلح .. سلح ... على الشعب وصوبوه

دا الكرسى مريح

والوزير سريح

والبطانة حواليا .. شغلالى مديح

معدلات تنمية .. واهى ارقام للتسلية

واهو شعب عايش .. عايش مطاطى الريح

من غلبه عايش .. عايش مطاطى الريح

من قهره عايش .. عايش مطاطى الريح

Twitter: @Hatemzaki9

Jan 16 2013

عد لأهلك سالما

المأساّه فى حادثة البدرشين مش فى ان عربيتين قطار انفصلوا و توفى كتير و اتصاب كتير من اخواتنا، المأساّه فى ان الموضوع بقى عادى عند ناس كتير، بقى فيه لامبالاة

حادثة واحدة كشفتلنا عيوب السكك الحديد ووزارة الصحة والامن الصناعى و المستشفيات والاحياء  .. وفى الاخر سواق القطر هو اللى هايتحبس واعتقد هايتكسف يشيل وزير النقل دا مكملش اسبوع بس

فكدة الناس هاترتاح وقلبها يبرد؟؟

والناس هاتسكت لحد المأساّة اللى جاية.. اللى ماحدش يقدر يتوقع هى هاتيجى فين .. الطرق المكسرة ولا الناس اللى بتمشى عكسى ولا تحت لورى بيجرى بسرعة جنونية  ولا الحمولة وقعت من المقطورة عشان مش مربوطة كويس

ولا بقعة زيت على الطريق

ولا فى القطار لما يخرج عن قضيبة ولا تحتة فى مزلقان العامل نسى يقفلة

وربنا وحده يعلم ممكن تبقى ايه كمان

الناس ساكتة ليه؟؟

مش خايف على نفسك ولا عيالك فى اوتوبيس المدرسة ولا مراتك اللى مروحة من على الدائرى ؟؟

بتصرف كام كل شهر على تصليح عربيتك بسبب الشوارع المكسرة؟

بتصرف كام على تجديد الرخصة و البوابات اللى المفروض بيروح ايرادهم للصرف على صيانة الطرق؟؟

كل دا بنتكلم فى حاجة واحدة بس انك تنزل من بيتك وترجع سليم انت و عربيتك

دا حتى لو ماكانش فيه مشاكل فى حياتك غير دى ثور يا اخى وقول كفاية كده

طول ما انت ساكت هم مش هايعملوا حاجة

بس لو جربت تعمل نص المجهود اللى بتعملة  و انت بتشتم اللى كسر عليك فى انك توصل صوتك هاتفرق كتير فى انك تسترد حقك انك تنزل من بيتك وتروح سليم

وعلى رأى المثل: "عد لأهلك سالما" او كما قالت هيئة الطرق والكبارى

الثورة مستمرة

Twitter: @Hatemzaki9

Jan 15 2013