اثبت مكانك كايروكى + زاب ثروت (الاغنية + الكلمات)

اثبت مكانك هنا عنوانك 

ده الخوف بيخاف منك و ضميرك عمره ما خانك

اثبت مكانك 

ده نور الشمس راجع

 يا تموت و انت واقف يا تعيش و انت راكع

اثبت مكانك ده عينيك شايفة الدليل

 ابعد عنهم و سيب الحيطة عليهم تميل

اثبت مكانك 

قلب الوطن اتجرح

 و صوت الحرية خلاص اتنبح 

كلامك ما بيتفهمش احساسك مابيتوصفش

كلامك ما بيتفهمش احساسك مابيتوصفش

 انت بتقول كرامة هما يردوا بمهانة

... انت بتقول العدل بيقولوا عنك ندل

اثبت مكانك هنا عنوانك 

ده الخوف بيخاف منك و ضمير عمره ما خانك

انت نور الفجر

 و هتافك صوته اعلي من صوت الخوف و الغدر

اثبت مكانك و ادعي وايا الادان

 لك رب اسمه الحق و العدل و السلام

اثبت مكانك و كتفك في كتف اخوك

 لو مهما راحت تروح الفكرة مش هتموت

كلامك ما بيتفهمش احساسك ما بيتوصفش

كلامك ما بيتفهمش احساسك ما بيتوصفش

انت بتقول كرامة هما يردوا بمهانة انت بتقول العدل بيقولوا عنك ندل

مطلوب منك السكوت تكون انسان بديل

مطلوب تسكت تموت او تعيش اسير

عايش في اكبر سجن بس من جوايا حر

حاضر حتعجب تكفي عني كل الشر

الولاء للماضي افكار لينا صديقة

كذب الكاذب جوايا تاكد الحقيقة

انعكاس تاريخ الزيف في المرايا واضح

طوبة تكسر المرايا للحقيقة فاضح

و مستورين من جوانا لو جسمنا انكشف

فاللي ينطق بالحقيقة بالخيانة اتوصف

انهازمي و انهزم لكن انتصاري اتسرق

الحقيقة فبروكها بحزن علي كتاب اتحرق

انا اللي ماتوا من سنة و اللي قاتل ما اتشنق

انا السطور علي الورق انا اللي من جوا اتحرق

انا اللي شعر شاب بموته و هو طالب مدرسة

انا اللي ثابت مهما قالوا و مهما زودوا الاسي

كلامك ما بيتفهمش احساسك ما بيتوصفش

كلامك ما بيتفهمش احساسك ما بيتوصفش

انت بتقول كرامة هما يردوا بمهانة انت بتقول العدل بيقولوا عنك ندل

Twitter: @Hatemzaki9

30 Jan 2012

Cairokee ft. Zap Tharwat

منصورة يا مصر - تميم البرغوثى ومصطفى سعيد (الاغنية + الكلمات)

منصورة يا مصر مش بجِميلة العسكر

إحنا اللى روَّحنا بدرى بس مش أكتر

قول للى روَّح عشان يرتاح فما ارتاحشى

الراحة كلِّ ما تستعجلها تِتْأخَّر

واللى ها ينزل ها يُحكُم لو ما روَّحشى

قصر الرياسة ببلاش، بسِّ انت مستخسر

قصر الرياسة ما فيش بينك وبينه كتير

فيه سلك شائك وكيس رملة وكُشْك غفير

لو جيت لوحدك، ها يضرب، والرقاب ها تطير

وان رحت مليون، ها يهرب، وانتَ تبقى أمير

رئيسنا واحد شهيد، يحكُم من التحرير

قصر الرياسة الجديد بِصينِيَّة ومدوَّر

منصورة يا مصر بجِميلة خيام الخيش

بيحرقوه عشان تمشى فمابتمشيش

يا مصر عُمْرِ ما فيه ثورة تقوم بِشْوِيش

المُلك ده اللى ادِّتيه للعسكرى بقشيش

حقّ الغلابة اللى ماتوا فى طابور العيش

وبنت عَرّوها فى الشارع وشيخ أزهر

نفس العَدُو هُوَّه هُوَّه بَسِّ متنكَّر

الصبح طالع لِقِى دبابة فوق راسُه

مربَّعة فوق دماغُه وكاتمة أنفاسُه

والشرق مقفول وخِتْمِ النِّسر ترباسُه

قام خبَّا شمسُه ووزَّعها على ناسُه

على العيال اللى ماتوا غدر وانداسوا

بقى شرق فى كل جسم، وشمس بتنوَّر

كان للفراعنة إله قرد وإله تمساح

وللإله كهنة و حرس يقف بسلاح

وخزنة متقفِّلة بالضبة والمفتاح

وقصر يشبه قصور الجمهورية بَراح

يا عينى ع الآلهة بقوا فرجة للسياح

ياللى بنسر وسيفين فرحان ومتكبَّر

الشمس تُدعى الغزالة فى اللغة فاعلم

وبالغزالة المضيئة فى السما باحلم

غزالة ممكن تبيِّن طبعها الوحشي

ما يغرّكمش الأسامى ورقِّة المبسم

دى شمس واللى يكتفها ما يفلحشي

ومصر حالفة ها تتحرر، هاتتحرر

Twitter: @Hatemzaki9

30 Jan 2012

Mansoura ya Masr: 

Lyrics:Tamim elbarghouti

Song: Mostafa Saieed

25 يناير 2012

·         لو انت مبسوط انك نزلت انتخبت لأول مرة بنزاهة .. إفتكر مين اللى ضحى بنفسه عشان تشارك فى مستقبل بلدك .. إنزل يوم 25 يناير ودافع عن حقك و حقهم

·         لو انت نزلت الشارع إحتفالا بسقوط مبارك ..اديك عرفت ان المجلس زيه زى مبارك .. إنزل يوم 25 عشان تعمل الصح

·         لو بقيت بتحس بإحساس مختلف و انت بتسمع النشيد الوطنى .. إفتكر مين اللى رفع راسك فوق .. إفتكر انك مصرى و انزل يوم 25 يناير عشان تفضل راسك فوق

·         لو شفت الانبهار بيك كمصرى فى عيون الاجانب .. إفتكر مين اللى كان مخلى منظر المصريين زباله و مين اللى نظف شكل المصريين فى عيون الاجانب .. إنزل يوم 25 عشان بدأنا نرجع للمنظر الزباله تانى

·         لو انت بدأت تتكلم فى السياسه بعد ماكنت بتخاف تتكلم فيها اومالكش فيها .. إفتكر نعمة النظر اللى ناس ضحت بيها عشان تعرف تشوف مستقبل بلدك

·         لو حسيت ان البلد بقت بتاعتك بعد ما كانت بتاعة العصابة .. إفتكر مين اللى ضحى عشان يرجعلك البلد

·         لو كنت بتخاف تتوقف فى لجنة و الظابط يطنطط عليك .. إفتكر مين اللى خللى الظابط يعاملك بإحترام .. إنزل يوم 25 عشان الداخلية رجعت تانى زى الاول و اوسخ

·         لو كنت هاجمت الثوار فى يناير 2011 .. اديك عرفت الصح .. إنزل يوم 25 عشان انت واحد من اللى ليهم حقوق فى البلد

Twitter: @Hatemzaki9

17 January 2012

مافيش رجوع - محمد اسامة (الاغنية + الكلمات)

اقر و انا فى كامل قواى العقلية

انى هادافع عن الشعب المصرى ضد الظلم و القهر

ضد السلبية و الاستعباد و الفساد

ضد كل حاجة ممكن تسلب حقوقه

و اخيرا ... ضد العدوان

مافيبش رجوع

دى ثورة بعد جوع

جاى ناخد بتارنا بدل الدم و الدموع

مش هانقبل غير وقوفنا كلنا وقت الشروق

ايد بإيد بقلب دامى نتحد .. مافيش فروق

الامانى فى العروق بتتحول لعلم مصر

احمر و ابيض و اسود متشبعة بروح النسر

مهما قالوا عن كلامى مفتعل او شعارات

هافضل اخلق الذريعة اللى بتدمر الانكسارات

سلاح عدوى هو يأسى من امل قريب

و طول ما فيا قدرة التنفس مش هاغيب

الميدان صوت القلوب النقية و العقول

مافيش مكان فى بلدى للمخرب و الفلول

يللا نوجد الامل حتى لو من العدم

عشان هاتندم لو ضعفت يوم ما ينفع الندم

بنتوحل فى كل درب عشان طريقنا واعر

استمد قوتك من العزيمة و المشاعر

مافيش رجوع .. حرية .. نزاهة .. كرامة .. مصر

العزيمة قيمة و الصمود جبل .. وسط الجموع

إرادة .. كفاح

مضادة للنباح

إكسر السلاسل إوجد السبل

مافبش رجوع

مش هاتدبل الورود

مش هاينطفى الصمود

مش هايبطل حفيدى يحكى اللى عمله الجدود

انتفضنا للمقاومة .. جيل مايعرفش الهزار

نسترد كل حث .. خلاص بأه القرار

مافيش هروب .. مافيش فرار

قبل راية الانتصار

قبل ما السعادة تتولد فى كل دار و دار

قبل ما كل ارض بور فى مصر تتحول خضار

قبل ما ابدأ ارسم وش مبتسم غلى الجدار

تنتصر او تندفن ليك حرية الاختيار

انا عن نفسى هافدى نفسى و انا بعدل المسار

هافك اسر كل روح سجينة فى المغارة

مافيش مجال نشك او نكون ساعات حيارى

الامل سلاح مدمر لو نوجهه لهدف

انتهت طريقة ترك كل حاجة للصدف

و هانتصر فى كل حرب عشان قضيتى عادلة

الجريمة و العقاب .. لازم اوزن المعادلة

مافيش رجوع .. حرية .. نزاهة .. كرامة .. مصر

العزيمة قيمة و الصمود جبل .. وسط الجموع

إرادة .. كفاح

مضادة للنباح

إكسر السلاسل إوجد السبل

مافبش رجوع

Twitter: @Hatemzaki9

11 Jan 2012

رسالة الى المجلس العسكرى - عبد الرحمن الابنودى (الاغنية + الكلمات)

من كل جهات المدن الخرسا .. الوف شبان زاحفين يسألوا عن موت الفجر

استنوا الفجر ورا الفجر ان القتل يكف .. ان القبضه تخف

ولذلك خرجوا يطالبوا بالقبض على القبضه .. وتقديم الكف

الدم .. الدم قلب الميدان وعدله

وكأنه دن نحاس مصهور

انا عندى فكرة عن المدن اللى يكرهها النور

والقبر اللى يبات مش مسرور

وعندى فكرة عن العار

وميلاد النار

والسجن فى قلبى مش على رسمه سور

قلت له لأ يا بيه .. انا اسف

بلدى بربيع وصباح

ولسه فى قلبى هديل الينابيع

لسه فى صوتى صهيل المصباح

لسه العالم حيى رايح جى

بيفرق بين الدكنه وبين الضى

بلدى مهما تتضيع مش حتضيع

ما ضايع الا ميدان وسيع

يساع خيول الجميع

يقدم المقدام .. ويفرسن الفارس

ويترك الشجاعه للشجيع

ولا باعرف ابكى صحابى غير فى الليل

انا اللى واخد على القمر .. ومكلمه اطنان من الشهور

وعلى النظر من خلف كوة فى سور

واللى قتلنى ما ظهر له دليل

وفى ليله التشييع

كان القمر غافل .. مجاش

والنجم كان حافل .. لا بطل الرقصه ولا الارتعاش

لما بلغنى الخبر

اتزحم الباب

اتخاطفونى الاحباب

ده يغسل .. ده يكفن .. ده يعجن كف تراب

وانا كنت موصى لا تحملنى الا كتوف اخوان

اكلوا على خوان

وما بينهمش خيانه ولا خوان

والا نعشى ما هاينفدش من الباب

ما اجمل نومك على كتوف اصحابك

تنظر صادقك من كدابك

تبحث عن صاحب انبل وش

فى الزمن الغش

والرؤيه قصادى اتسعت

بصيت حاسب نفسى بين خلانى

تعالوا شوفوا الدنيا من مكانى

حاشتنا اغراض الحياه عن النظر

بالرغم من نبل الالم والانتظار

اتعلمنا حاجات اقلها الحذر

ونمنا سنوات مدهشه

نحلب ليالى حلمنا المنتظر

وامتلات الاسواق بالمواكب

تبيع صديد الوهم والمراكب

وفارشه بالوطن على الرصيف

بالفكر والجياع وبالعناكب ومذله الرغيف

يا عم الضابط انت كداب

واللى باعتك كداب

مش بالذل حاشوفكم غير

ولا استرجى منكم خير

انتم كلاب الحاكم

واحنا الطير

انتم التوجيف واحنا السيل

انتم لصوص القوت

واحنا بنبنى بيوت

احنا الصوت ساعه ما تحبوا الدنيا سكوت

احنا شعبين .. شعبين .. شعبين

شوف الاول فين؟

والتانى فين؟

وآدى الخط ما بين الاتنين بيفوت

انتم بعتم الارض بفاسها .. بناسها

فى ميدان الدنيا فكيتوا لباسها

بانت وش صدر

بطن وضهر

والريحه سبقت طلعه انفاسها

واحنا ولاد الكلب الشعب

احنا بتوع الاجمل وطريقه الصعب

والضرب ببوز الجزمه وبسن الكعب

والموت فى الحرب

لكن انتم خلقكم سيد الملك

جاهزين للملك

ايديكم نعمت من طول ما بتفتل وبتقتل ليالينا الحلك

احنا الهلك وانت الترك

سواها بحكمته صاحب الملك

انا المسجون المطحون

اللى تاريخى مركون

وانت قلاوون وابن طولون ونابليون

الزنزانه دى مبنيه قبل الكون

قبل الظلم ما يكسب جولات اللون

يا عم الضابط

احبسنى .. رأينا خلف خلاف

سففنى الحنضل واتعسنى .. رأينا خلف خلاف

احبسنى او اطلقنى وادهسنى .. رأينا خلف خلاف

واذا كنت لوحدى دلوقت

بكره مع الوقت

حتزور الزنزانه دى اجيال

واكيد فيه جيل

اوصافه غير نفس الاوصاف

ان شاف يوعى

وان وعى ما يخاف

انتم الخونه حتى لو خانى ظنى

خد مفاتيح سجنك واترك لى وطنى

وطنى غير وطنك

ومشى

قلت لنفسى: "ما خدمك الا من سجنك"

Twitter:: @ Hatemzaki9
January 9 2012