منصورة يا مصر مش بجِميلة العسكر
إحنا اللى روَّحنا بدرى بس مش أكتر
قول للى روَّح عشان يرتاح فما ارتاحشى
الراحة كلِّ ما تستعجلها تِتْأخَّر
واللى ها ينزل ها يُحكُم لو ما روَّحشى
قصر الرياسة ببلاش، بسِّ انت مستخسر
قصر الرياسة ما فيش بينك وبينه كتير
فيه سلك شائك وكيس رملة وكُشْك غفير
لو جيت لوحدك، ها يضرب، والرقاب ها تطير
وان رحت مليون، ها يهرب، وانتَ تبقى أمير
رئيسنا واحد شهيد، يحكُم من التحرير
قصر الرياسة الجديد بِصينِيَّة ومدوَّر
منصورة يا مصر بجِميلة خيام الخيش
بيحرقوه عشان تمشى فمابتمشيش
يا مصر عُمْرِ ما فيه ثورة تقوم بِشْوِيش
المُلك ده اللى ادِّتيه للعسكرى بقشيش
حقّ الغلابة اللى ماتوا فى طابور العيش
وبنت عَرّوها فى الشارع وشيخ أزهر
نفس العَدُو هُوَّه هُوَّه بَسِّ متنكَّر
الصبح طالع لِقِى دبابة فوق راسُه
مربَّعة فوق دماغُه وكاتمة أنفاسُه
والشرق مقفول وخِتْمِ النِّسر ترباسُه
قام خبَّا شمسُه ووزَّعها على ناسُه
على العيال اللى ماتوا غدر وانداسوا
بقى شرق فى كل جسم، وشمس بتنوَّر
كان للفراعنة إله قرد وإله تمساح
وللإله كهنة و حرس يقف بسلاح
وخزنة متقفِّلة بالضبة والمفتاح
وقصر يشبه قصور الجمهورية بَراح
يا عينى ع الآلهة بقوا فرجة للسياح
ياللى بنسر وسيفين فرحان ومتكبَّر
الشمس تُدعى الغزالة فى اللغة فاعلم
وبالغزالة المضيئة فى السما باحلم
غزالة ممكن تبيِّن طبعها الوحشي
ما يغرّكمش الأسامى ورقِّة المبسم
دى شمس واللى يكتفها ما يفلحشي
ومصر حالفة ها تتحرر، هاتتحرر
30 Jan 2012
Mansoura ya Masr:
Lyrics:Tamim elbarghouti
Song: Mostafa Saieed
ليست هناك تعليقات:
إرسال تعليق