موقعة الرمق الاخير
اية اللى خللى موقعة الجمل تحصل ؟
اللى حصل ان النظام حاول إقناع الشعب ان اللى نزل ميادين التحرير اعداء الوطن و بعدين ضربهم و حاول بكل الطرق يطلعوا من الميدان دا حتى إن الشرطة العسكرية قطعت الاكل و الادوية عنهم
لكن سبحان الله الناس قعدت و زادت و صمموا اكتر
اتأكدوا ان الشعب قاعد و مش ماشى غير مايمشى
بكدة شبكة المصالح هاتبوظ. و شبكة المصالح تتكون من الرئيس و اعوانة و قيادات فى الداخلية و رجال اعمال و اعوانهم و بعض اعضاء مجلس الشعب و الشورى اللى دفعوا ملاين و مااستفادوش منها و البلطجية اللى كانوا عايشين على حماية الشبكة و المحافظة على مصالحهم و مساعدتهم فى الانتخابات
يبقى كل واحد من الشبكة يعمل اللى علية و يقدر يقدمة للقضاء على الثورة دى
اللى معاة فلوس يدفع ... و اللى عندة بلطجية يجيب ... و اللى عندة اسلحة يديى للبلطجية ... و اللى عندة جمال و حمير يركب
و اللى عندة عربيات نقل يجيب و ينقل ... و اللى عندة اتصالات يعتم ... و اللى عندة القوة العسكرية يبقى محايد سلبى
و اللى تحت ايدة تلفزيون و راديو يسكت و يعرض افلام و اغانى
و حتى بكل الجبروت دا الشعب طلع اقوى من كل دا و صمم و ماهربش و ثبت رجلة فى الميدان
و الموقعة دى من اهم اسباب نجاح الثورة
اية اللى حصل بعد الموقعة دى ؟ استسلموا ؟ اكيد لأ
وصلوا لإتفاق مع مبارك ان هايكون فية منهم شوية كبش فدا و مش هايتضروا
و ادينا شايفين لسة احمد عز هو محتكر الحديد فى مصر و مافيش رجل اعمال واحد دفع جنية مع انهم عرضوا فى الاول دا معناة إعتراف منهم و مع كدة اخدوا براءة !!!
طيب الناس زهقت و حسوا ان اتضحك عليهم و اخدوا على قفاهم
نزلوا الميادين و مش زى اى نزلة دى نزلة و مش راجعة غير لما تحس إن القضبان اتغيرت و تحس ان فية ناس "فعلا" بتاخد قرارات ثورية ترضى طموح الشعب مش زى اى مليونية حصلت قبل كدة
طيب اية لزمة الكلام دا دلوقتى ما الكل عارف التفاصيل دى
لزمة الكلام ان شبكة المصالح دى مكشوفة دلوقتى و فية خساير ليها و استمرار تضامن الشعب يعنى خسارة مباشرة ليها
يعنى الشعب كل ما يكون على قلب رجل واحد معناها نهايتهم قربت
و كل ما نهايتهم بتقرب كل ما شراستهم بتزيد كل ما الغشم يزيد
بمعنى ان كل ما الشعب يتضامن اكتر كل ما الشبكة بتضامن اكتر ضدها
انا متأكد و العلم لله ان الاعتصام دلوقتى لو كمل لغاية تحقيق المطالب هايكون فية حرب على ميادين التحرير و اكترهم شراسة فى ميدان التحرير
حرب هاتكون شرسة و رهيبة و طبعا هايكون الجيش متفرج كالعادة ... هاتكون موقعة الرمق الاخير
نحن ننتظر الشهداء القادمون
الكل يفتح صدرة للموت مرحب بة
الروح فى السماء
و الكل يتكاتف فى أامن مكان فى مصر "ميادين التحرير"
الكل يحتمى بإخوانة و أخواتة
ماتسبش الميدان غير ماتاخد حقك
حاتم زكى
Follow on Twitter: @Hatemzaki9
8 September 2011
ليست هناك تعليقات:
إرسال تعليق